Baie kinders wat motoriese ontwikkelingsagterstande toon of wat leerprobleme op skool ervaar het al baat gevind by die beoefening van sulke sportsoorte.

Sensories en motories word veral die volgende bevorder tydens die beoefening van Karate:

• Vestibulêr-proprioseptiewe prossesering.  Dit is die sensasie wat verkry word van die liggaam se posisie en bewegings.  Dit speel ’n belangrike rol in postuurfunksies soos spiertonus, balans, posturele agtergrondsbeweging asook skouer en nekstabiliteit wat weer ’n belangrike invloed het op growwe en fyn koördinasie.  Samewerking tussen die visuele en motoriese sisteme is hier belangrik.  Die oë rig byvoorbeeld die hand in aksie.
• Bilaterale integrasie is die kommunikasie tussen die breinhelftes wat noodsaaklik is om die liggaam op ’n gekoördineerde wyse te gebruik, veral met opeenvolgende aksies en om die midlyn te kruis.
• Motoriese beplanning (Praksis) is die ideevorming, beplanning en uitvoering van ’n sekere aksie of reeks aksies.  Nuwe aksies word beplan deur gebruik te maak van kennis en ondervinding van vorige bewegings.  Die tasstelsel, propriosepsie en vestibulêre sensasie is veral belangrik om hierdie kennis van liggaamsbeweging en die gebruik daarvan oor te dra.  Tydens die aanleer van ’n Kata word die kind (Karateka) elke stap/beweging afsonderlik geleer en daarna ook hoe om van een beweging na die volgende oor te gaan totdat ’n vloeiende reeks bewegings verkry word.  (Motoriese beplanning word op soortgelyke wyse tydens terapie aangeleer en ingeoefen).  Wanneer ’n kind egter veg (Kumite), moet hy die kennis wat hy tot op daardie stadium van Karate opgedoen het inspan om onbeplande bewegings uit te voer ten einde sy opponent te probeer uitoorlê.
• Visuele persepsie kan ook verbeter word deur Karate of soortgelyke oefeninge en dan veral betreffende visuele posisie en die ruimte en ruimtelike verhoudings.  Dit is die persepsie van waar die liggaam hom in die ruimte bevind, asook die verhouding van die liggaam teenoor ander voorwerpe (of liggame).  Visuele geheue en reeksgeheue word ook bevorder, veral tydens kata bewegings aangesien ‘n kind elke beweging sien en moet onthou, maar ook die volgorde van bewegings moet onthou.
• Konsentrasie en aandag word ook bevorder, aangesien die kind intensief moet luister en kyk wat die Sensei (afrigter) vir hom sê en wys.  Verder moet hy ook voortdurend konsentreer op elke beweging om dit korrek uit te voer.
• Karate bevorder ook ’n kind se selfdissipline, verhoog sy eiewaarde, leer hom om saam met ander kinders te werk, maar ook om sy man te staan.  Dit help ook om van oortollige energie ontslae te raak op ’n aanvaarbare wyse.